ستة أشهر - قصة(موقف)قصيرة جدا

"اتفضلي يا ستي الأشعات بتاعتك"

عدت لها بعد ان عرضت أشعاتها علي الجراح المختص لأعيدها إليها

"شكرا يا دكتور , و النبي ألأشعة فيها حاجة؟؟"

"قوليلي بس الأول , هو مين الجدع ....أو الجدعة دي ؟؟" كان هناك طفل رضيع علي قدميها

"ده أحمد , الجنبي سلفتهولي عشان يسليني شوية"

"يسليكي , هم ولاد الناس لعبة؟؟"

ضحكت "أصلي زهقت قوي يا دكتور , نفسي أروح بئا , قوللي بئا أن الأشعة مفيهاش حاجة"

"بصي يا ستي , الجراح قاللي ان أشعة دي مفيهاش حاجة , بس يوم السبت هيعملولك شوية فحوصات تانية عشان تتطمني خالص"

و أبتسامتي علي وجهي....كذبت,في الواقع قال لي الجراح انها مصابة بورم غالباما يكون خبيث إذا ما ظهر في مثل عمرها و أستأصاله غالبا ما يكون أجراء مسكن ,و انها غالبا سيتبقي لها حوالي 6 شهور بعدالجراحة .

"متكدبش عليا يا دكتور , عنيك بتقول كلام غير ده , قوللي الحقيقة انامبخافش"

كذبت هي , فهي تخاف جدا لدرجة ان تلك الأشعة فشلنا في عملها لأنها ارتعبت بشدة من جهاز التصوير و أضطررنا لحجز موعد أخر بمساعدة التخدير ,ربما تقول أوراقهاانها ذات 32 عاما , و لكن تراها تحسبها فتاة صغيرة في سن المراهقة

"يا بنتي بقولك الجراح مئاليش أن في أي حاجة خطر أن شاء الله , وبعدين لو في حاجة مانتي هتعرفي هتعرفي , أخبي انا عليكي ليه؟؟"

كذبت مرة أخري , و أنا أحاول بصعوبة أن أحافظ علي تلك الأبتسامة الزائفةعلي وجهي , كيف تقول الحقيقة لتلك الطفلة الضاحكة و هي تحمل علي قدميها هذا الطفل و غالبا تحلم بأن تكون أما لواحد مثله

"ماشي يا دكتور , ربنا يطمنك و لو أن عينيك بتقول أنك مخبي عليا حاجة"

"انا عنيا عايزة تنام , مفيش أكتر من كدة , سلام عليكم "

تركتها , أو بمعني أصح هربت منها , لا أعرف أذا ما كان ما فعلته صحيح أوخطأ و لكن لم يكن هذا ما كنت أفكر فيه , كل ما كنت أفكر به يومها .....ماذا لو علمت أنك سترحل بعد 6 شهور ...بالطبع أول أقتراح هو أفتراش سجادة الصلاة و ما إلي ذلك ,و لكني لست مقتنعا,و كأني أحاول ان أقنع نفسي بالنجاح في أمتحان و أنا اعرف أسئلته مسبقا

(let the people you love know that you love them)

أري الفكرة كثيرا في الأفلام الرومانسية و لكني لم أقتنع بها أبدا,بل من وحهة نظري هي فكرة سخيفة , لماذا تقول لشخص انك تحبه و بالأضافة لذلك أنك ستتركه بعد بضعة أيام .....سخف

سافر إلي بلاد مختلفة , لماذا .....تعلم شيئا جديدا .....أصلا الغرض من التعليم مفقود هنا

لا أعرف , الحمد لله علي نعمة الجهل ببعض الأشياء ...

What if you have 24 hours ????

24-jem

طموح حجر

بالطبع ليس لي اسم, فأنا حجر , بل انا جزء من حجر اكبر في الميدان , لا اعلم إلي اي جبل انتمي او من اي صحراء

اتيت ,لكن بحكم  سكني الأن فجنسيتي مصري,رغم اني حجر,و حياتي تتلخص في الثبات إلا اني رأيت في

مكاني الكثير , سار علي وجهي كل انواع البشر , سار فوقي الشحاذين و الباعة الجائلين و رجال الأعمال و الطلبة

و بعض من حسناوات الغرب, و لكن هذا هو كل شئ, كل ما يحمله لي موقع عملي هو الرؤية و الخبرة,و لكن

لطالما كان طموحي اكبر من ذلك,لطالمة كنت احلم ان اكون جزئا من شئ كبير ,تمثال (نهضة مصر) علي سبيل

المثال ,او ان اكون حجرا من احجار الأهرام,حلمت ان اتحرك لأكون جزئا من حدث كبير , كم اتحرق غيرة من احجار

القدس , إذ يمسك بهم الشباب والأطفال فيطيرون ليهبطوا علي رئوس جنود العدو الصهيوني المحتل , حتي

ان الأنتفاضة سميت بأسمهم ,(انتفاضة الحجارة),يا له من شرف ,و لكن تستمر حياتي علي نفس الوتيرة المملة

, حتي جاء هذا اليوم و امتلأ الميدان بالناس يهتفون (عيش,حرية,عدالة اجتماعية) و (الشعب يريد اسقاط النظام),

و اخذت قوات الشرطة تحيط باميدان مقنعين الناس بأنهم هنا لتأمينهم لا الأعتداء عليهم , لو كنت استطيع الكلام

لنصحتهم بألا يثقوا بهم ,و اذ يتححق توقعي نحو الساعة الحادية عشر اخذت الأرجل تجري من فوقي و اخذت

مقذوفات قوات الشرطة بأنواعها من قنابل منتهية الصلاحية و رصاصات مطاطية و بعض من الرصاصات الحية

,لن اطيل في وصف تلك الأيام فقد تناولتها الجرائد جيدا, نعم اطالع الجرائد, اليست ملقاه بجانبي دائما , اي

شئ لكسر هذا الملل ,حتي جاء يوم الثاني من فبراير , بعد ان القي هذا الرجل خطابه الثاني و لم احتاج للكلام

هذه المرة , فلم يصدقه احد ,و رأيت أخرين يقتحمون الميدان علي الجياد و الجمال , و بدأت المعركة ,أشعر

ان اليوم هو حدثي الكبير , تعاون بعض الرجال علي كسر الحجر الأكبر فأنفصلت عن زملائي, و امسك بي

احدهم و القاني في الهواء,فطرت حتي اقتربت من هذا الشاب,نعم اعرفه,كان يجلس علي مقربة مني يعزف

علي عوده و يشدوا بأغاني الشيخ امام و كان صوته جميل حتي ان المحيطين كانو يصفقون له قدر الاغنية

نفسها عندما ينتهي, ليتني اتزحح قليلا إلي اليمين او الشمال فأخطأه, ولكن هيهات, ارتطمت بقوة برأسه

و سقطت علي الأرض ليسقط بدوره بجانبي و سالت الدماء من رأسه بغزارة حتي اغرقتني, يا لها من

نهاية , اصبحت قاتل,ليتني كنت مت قبل هذا اليوم ,ليتني استطيع ان اموت,للأسف انا حجر

soundtrack: shape of my heart - sting

زلابية 5 , زلابياية فليبينية

رمضان السنة دي مختلف , ماما و أختي مسافرين , يعني بيت بلا مرأة,صحيح ماما صدمتني بأنواع المأكولات الممكن تعيش في الفريزر , لكن في النهاية في حاجات لازم هتتعمل , ايوة , انا لوحدي , اخويا ده كائن متعدد الخلايا يتغذي علي الموجات المنبعثة من اللاب توب بتاعه,ابن عمي معانا بعض ايام الأسبوع لما بيبقي في القاهرة و كائن زي أخويا و بيتغذي بنفس الطريقة

اول تحدي يواجهني في المطبخ هو الرز ,لكن احنا في عصر عيب تقول فيه انك متعرفش تعمل حاجة ,يعني عملية الزايدة موجودة علي اليو تيوب ,يبقي عيب نتكلم في حلة رز ,لقيت فيديو لطيف من قناة فتافيت , و عملت الرز ,بس المشكلة ان الست قاعدة تقول كلام من نوعية "عمل الرز مشكلة بتواجه كل عروسة جديدة" , بجد حاجة مهينة ,ليه أحتكار المشكلة للستات , هتفهم قصدي لو افتكرت احساسك و انت بتتفرج علي أعلانات شامبو الشعر و كل تفكيرك " (هيد اند شولدرز) كويس بس بيحل مشكلة واحدة, و (كلير) زي الزفت ,و بعدين انا أصلا معنديش قشرة , مش لازم أبئا هند صبري عشان أستخدم (جارنيير)" #رز

ابن عمي عندنا , استكمالا لصورة شقة الطلبة الأحنا فيها - بأستبعاد إني الطالب الوحيد -,نفس اسلوب اخويا , الأتنين قاعدين قدام اللاب توب إلي ان يأذن المغرب في عدم مبالاه تامة لمين هيعمل الأكل , اكيد الفليبينية
اخوية دخل المطبخ قبل المغرب بنص ساعة
"عملت شوربة؟؟؟"
"لا"
"بس انت قلت انك هتعمل شوربة"
"استخدمتها في الرز,وبعدين انت تاكل الهيتحطلك,انا مش الفليبينية الجابتهالك خالتك"
"ماشي يا شيف"
بعدها بربع ساعة....
"إيه ده,متحطش بصل في السلطة"
"هشيل حبة ليك,و متجيش هنا تاني , و لاحظ أني مسلح"
بعد 5 دقايق دخل هو و ابن عمي
"إيه ده , متحطش طماطم في السلطة , مبحبهااش"
انا لقيت نفسي بعمل حركات ياباني بالسكينة مستحضر روح ليوناردو (سلاحف النينجا...تاني)ه
"يلا يا كلب منك له برا"
"صلو عالنبي يا رجالة مش كدا"
"براااااااا"
"بترقصلي السكينة,طب هقول لماما , امثالك هما الخلوا الغرب يقول علينا أرهابيين"
 "براااااااا يا كلاااب"


قررت أعمل حاجة حلوة , كريم كراميل , الباودر السريع ده طبعا , جاي في العلبة كيس فيه صوص كراميل و لسبب ما قررت ان الصوص ده قليل , و إيه يعني , نعمل كراميل ,شوية سكر علي النار علي شوية مية و.....نص لمونة , فشلت طبعا لكن المهم اني كل ما كنت أحكي الوصفة دي في اي قعدة كانت بتقلب بضحك هستيري خاصتا من الستات,لاحقا اكتشفت ان الكاراميل الأنا عملته ده مش للأكل , له أستخدامات أخري , لمعلومات أكثر يرجي مشاهدة فيلم (سكر بنات) للمخرجة نادين لبكي


لا أله إلا الله , الحدث كبير ,زلزال حصل في الفيس بوك,الشهيدة يسرا اللوزي أتدبحت كده,علي مرأي و مسمع من شعب مصر...و من أحمد السقا,ده كان سبب كافي اني اتابع باقي المسلسل ,رغم انه مفقوس أوي, تيمة التحول من قمة الخير لقمة الشر بسبب تلطيش الدنيا,لكن احمد السقا كممثل مبيعرفش يبقي شرير فأكيد ربنا هيهديه في الأخر و هيحل كل المشاكل و هيصالح اخوه  و دياب هيشهر اسلامه و...الخ

نقطة علي الهامش بخصوص مسلسل السقا ,بالنسبة لمعدل كل حلقة جثة..... (أروي جودة) خط أحمر , أظن الرسالة وصلت ,لا بجد هتغابا عليكوا , مش ناقصة نكد

نصيحة لكل الشباب المضطرين يطبخوا , فكر 100 مرة قبل ما تتعامل مع فرخة نية , بمعني تفكها و تغسلها ...الخ , لا فعلا نظرتك للفراخ هتتغير , علاقتك كلها بالفراخ هتتغير #يع

عايز اسجل احترامي و تقديري و شكرانيتي لماجي , الست الاخترعت المكعبات , أختراع رائع , صحيح الله اعلم المكعب ده مهروس فيه إيه , بس الرز طلع عالمي , لدرجة أتاكل سادة كده و نسينا نحط عليه الملوخية  #رز

في حاجات في الحياة الفلوس متشتريهاش , بمعني , الفلوس تشتري لحمة , لكن متشتريش الموهبة او (النفس), و ان حضرتك تحطي لحمة مفرومة علي الرز مش معناها انك بتعرفي تطبخي , معناها ان معاكي فلوس تجيبي لحمة و ترشيها علي اي حاجة #عزومة #رز

معزوم عند صاحبي  , طبعا مبسوط , يوم اكيد هيبقي حلو و لمة صحاب و كل حاجة, بس المجنني و مكدر عليا اليوم كله ان اخويا و ابن عمي هيجيبوا أكل من برة , قمة المجهود ان هيطلعوا حواوشي من الجاهز في الفريزر و 5 دقايق في الميكرو ويف و أتعشت.....أو فطرت ,تحت شعار (خلي التقيل لما الفلبينية تيجي) #عزومة

بالمناسبة , المجد للميكرو ويف , يعني من اعظم الأجهزة الممكن تكون في حياة البني أدم , يكاد يكون بجمودية البلاي ستيشن , لأ و كله كوم و ال (دي فروست) ده كوم تاني,أول مرة أتعامل مع الخاصية دي بس يعني أشي خيالي يا ناس , حلمي بئا ميكرو ويف بالعكس , بيسقع يعني ,تخيل 

المصريين بياخدوا بعض الطقوس الرمضانية علي صدرهم شوية , حاجات جميلة لكن .... يعني مينفعش انك توقف شارع رئيسي في عز الفضا ساعة الأذان عشان تدي الناس كباية سوبيا ...أجباري, و مينفعش خالص ان مصليين التراويح يصلوا في الشارع و يقفلوا نص شارع رئيسي في فيصل و النص التاني يشتغل أتجاهين

عزيزي المصلي , ان موبايلك يرن مرة ...ماشي ,نسيت , لكن ان نخلص ركعتين و ندخل في اتنين جداد و موبايلاك يرن فيهم 3 مرات , كده كتير , نفس الكلام ينطبق لو الرنة دعاء للشيخ مشاري راشد , او (أذان قناة المحور الذي أبكي الملايين) أو اغنية مقدمة مسلسل الشيخ الشعراوي بتاعت محمد فؤاد

اخويا سافر النهاردة البرتغال , مش عارف مؤتمر الأمم المتحدة لحقوق الكذا كذا كذا مش شغلي , مفيش اي فرق,انا الكنت شايل البيت و انا الهشيله , الفكرة بس اني دلوقتي لوحدي فعلا , و بعدين لسة متسحر أمبارح مع صحابي في مطعم في العجوزة و صاحي علي خبر ان واحد منهم جاله تسمم , حالة الترقب رهيبة , لدرجة اتصلت بماما قلتلها تتصل بيا كل ساعة , مش عارف هتعمل إيه لو مردتش و هي في قارة تانية , أهو كدة و خلاص

و الله ما تريقة -عشان الحوارات بتنتشر في عيلتنا زي السكينة في الحلاوة و ممكن حد يقرا بالصدفة- ,العيب مني انا ,انا كائن غريب أجتماعيا , برتبك فعلا في التجمعات الأجتماعية زي الأفراح و خلافه , يعني من الأخر مينفعش حضرتك تعزمني و أدخل البيت الاقي سيادتك عازم معايا عيلة المدام كلها , مش انا التتحط في وشي طفلة و يتقالي "ها يا دكتور , إيه رأيك في عروستنا ؟؟؟" , طفلة مالها يعني , "ما شاء الله ربنا يخلي" , و أبدا , لأ , مش هسقف عشان لولي ترقص , و مش هسقف عشان لولي تاكل , و مؤكد مش هزغرط عشان لولي كلت . #عزومة #لولي


كل سنة و انتوا طيبين , من الولد الغريب البيكتب عن رمضان في عيد الكبير (أنظر زلابية 1)ء

i don't know why , but this song is so cool when u r home alone.... john mayer strikes again

who says-john mayer

زلابية 4 - زلابية مسمومة

كنت بقلب في الكراسة لقيت الزلابياية دي , من ايام اللجان الشعبية ,كانت ايام حلوة ,كل شاب فينا عاش حلم مستحيل في أرض الواقع , كل واحد عاش الظابط و البلطجي الجواه في نفس الوقت,تجربة جامدة اتمني انها مترجعش تاني ,بس ممكن ,لسة محدش عرف مين الطرف التالت و الدولة العميقة و حماس و الأمر بالمعروف و الخ

********************************************************

-دلوقتي القوات المسلحة بعتتلي رسالة بتقول بالبلدي (انزل احمي بيتك و الممتلكات الخاصة و العامة) و بعدها بعتوا رسالة (في حظر تجول و الهينزل من بيته ملوش دية) , يعني انا اعمل إيه دلوقتي , امسك (سنايبر) و اقعد في البلكونة ؟؟؟

-"طيب يا ماما انا نازل"

"مع السلامة"

"قال في ضرب نار في شارع شهاب"

"اه,في واحد من الدقي اتصل علي (أو تي في) بيقول في عربية كيا سيراتو سودة ماشية في الدقي بتضرب نار"

"طيب , ربنا يستر, انا نازل "

"مع السلامة"

نزلت ..... بعد شوية ,كل الناس موبيلاتهم بترن من وقت للتاني  , ماااشي

انا ؟؟؟مفيش ,طب اتصل انا

"الو , عاملين إبه"

اختي :"كلهم نايمين و انا تقريبا نايمة" ء

الناس دي لقيتني علي باب جامع ؟؟؟؟؟

-الناس بتضرب نار تفاريح , فعلا في واحد ضرب خمس طلقات رصاص حي عشان يصطاد عرسة

-مشكلة لما المنطقة بتعرف انك طالب في كلية طب , خلاص , انت في نظرهم دكتور , متخصص في كل حاجة , الأسوأ ان في ظرف كله ذكور زي اللجان مبتتسألش غير عن حاجة واحدة ........ (الصحة الأنجابية) , طيب المثل بيقول اسأل مجرب ولا تسأل طبيب , و انا و الحمد لله لا ده ولا ده,اسئلة كتير بئا ,و لو ربنا فرجها و اتسألت في موضوع تاني بيبئا سؤال واحد ...."يا دكتور , هو إيه الفرق بين الحشيش و البانجو  ؟؟ " , مرة تاني , لا مجرب ولا طبيب

-في حالة تبادل منظم حاصلة في البيت , انا بطلع الصبح اصحي بابا و اخويا يروحو الميدان , يرجعوا بليل اكون صحيت او يصحوني انزل و هكذا , المهم انهم قرروا في يوم يرجعوا من الميدان مشي و بابا انبهر بمنظر اللجان الشعبية فقرر يجاملهم و اشتري كام طبق زلابية من فرن في شارع التحرير و قعد يوزعها عليهم , الأهم ان بعدها بيومين طلع اشاعة ان في راجل بيمشي في الدقي بيوزع علي الشباب بقسماط مسموم ,الحمد لله , جت سليمة

-الناس مرعوبة , خايفة من الأزمة , اكيد المصانع وقفت , طيب لو الكمية الموجودة في السوق خلصت , هنعمل إيه ؟ هنتصرف ازاي ؟ هنموت يعني؟؟ لكن معظم الناس اتصرفت تاني يوم , كل الناس تقريبا نزلت تدور في المناطق المختلفة بحثا عن نوعها المفضل , و كل واحد قعد يتباهي بليل بغنائمه ,الأشتري خمس علب ميريت أصفر من العتبة , و الوحش النزل مخزن في امبابة و جاب خرطوشتين كاملين مارلوبورو ابيض , انا عارف انه كيف و بيذل , بس اني الاقي حد يتكلم عن العيش او الرز , ابدا

-غريب التناقض البتفرضه بعض المواقف , بمعني , لجنتنا لجنة شباب في دقي  ,يعني معظمنا فرافير إلي حد ما, لكن واقف معانة شاب اسمه (محمود)شهير ب(محمود ماسورة) , وافد من بين السرايات , بيقف يبيع عيش يوميا عند محطة المترو , مسجل خطر و الكل عارف , شخص مرفوض وجوده دايما من سكان المنطقة الشيك الحلوين ,النهاردة كلنا عايزينه معانا و لو مشي ربع ساعة الكل بيسأل عليه , كلنا من جوانا عارفين ان ساعة الجد هو الهيفرق , سبحان الله

-الساعة عشرة ,لسة بدري , الشارع عبارة عن نادي اجتماعي , جيل السبعينات و ستينات موجود و بيتناقش في السياسة , الأطفال موجودين و بيعملوا حاجة مش هيعملوها تاني في حياتهم , يعني بيلعبوا كورة في قلب شارع (محي الدين ابو العز) , و تمر الساعات ....و تقل الناس و يوصل الرعب لأعلي درجاته , إلي ان يأتي صوت في ايام كتيرة للأسف مبنسمعوش اساسا , يصاحبه احساس سريع بالدفئ و الأمان رغم البرد الشديد , أذان افجر

-الأشاعات بئا, جميع انواع العربيات بجميع الوانها فيها ناس معاها (ألي) و ماشيين بيضربوا نار في كل حتة ,و عربيات الشرطة و الأسعاف طبعا , احلي حاجة بقي في الموضوع ده خيال الأطفال و هم بيألفوا أشاعاتهم  ,سمعت مثلا ان في أخطبوط عند قسم الدقي , رجليه طالعة في كل في كل الشوارع الحوالين القسم,و في طيارة (اباتشي) بتضرب نار علي نادي الصيد ,حاجات كده 

-بوكس ازرق داخل الشارع , طبعا استوقفه الشباب و بصلنا الظابط الواضح انه علي الأقل عمليات خاصة نظرا لعضلاته

ه"سلام عليكم,عاش اوي يا رجالة ,من بكرة بئا هتطلعوا تناموا في البيت"... محصلش طبعا

و فجأة لقينا (عم احمد) -بتاع الكشك- مسك الظابط من هدومه و هاتك يا تهزيق و الناس تحوش إلي ان تدخل (جان) -بتاع محل الموبيلات-

"لامؤاخذة يا باشا اصله متعصب شوية"

ه"مش أسلوب يعني , و بعدين ما احنا نازلين اهو و بنقول هتناموا " في انكسار

"معلش يا باشا , اصله متغاظ شوية,اشوف بئا الكرنيهات بتاعكوا بعد أذنك كده يا باشا ؟؟"

لسه بيشوف الكرنيهات بتاعنهم و هيعديهم لئينا شاب جاي بيجري من شارع السودان ,"ارجاااالاا , محدش ييجي يقولكوا انا جيش ولا شرطة و تعدووووه , احنا اي حد بيعدي عندنا بنألعه ال...... "   , مش عارف ليه ما شاركتش في المليطة دي ,رغم ان رصيدي من الكراهية و النفساوية يسمح , بس ابئا كذاب لو معترفتش اني كنت مستمع

أظن محدش كان واقف في الشارع و مجوش علي باله

the real street heroes , (ninja turtles) , rapheal  is the best of course :)

*****************************************************

جالاكسي - قصة قصيرة جدا

السينما,ذلك العالم السحري ذو الابواب تطل علي عوالم خيالية, قصص مختلفة و غريبة,اما بالنسبة لمنير لم

تكن  كذلك , فهو ييبيت في ركن صغير بقرب الجراج و يصبح ليزاول عمله في قرية صغيرة منعزلة عن

هذا العالم ,  دورة مياه الرجال, هو ذلك العامل متعددالوظائف,تارة ينطف و اخري يملأ اوعية الصابون و

اخري يقطع  المناديل الورقية لمستخدمي الحمام املا ان يعطيه احدهم عملة اواثنين,لم تكن الوظيفة صعبة ,

فكان الحمام يمتلئ في فواصل الافلام و اغلب استخدام المكان هو التدخين,بعض من معطر الجو بعدعودتهم

إلي الصالة و ينتهي الأمر,في حفلات منتصف الليل كان يتسلل لمشاهدة الأفلام المعروضة,لكن اكثر قصة

كانت تأخذه هي قصة  الفتي العادي المقهور الذي تحدث في حياته تلك اللحظة الفارقة لتصنع منه بطل مثل

افلام الأبطال الخارقين,اما  في الحفلات الأخري كان يقف ليتابع فيلمه المفضل, جمهور السينما,فتيات و

شباب من نفس عمره , يلمعون دائما  بملابسهم الأنيقة و حقائبهم الملونة, يأتون من مدارسهم و كلياتهم , لكنه

كان يلاحظها هي,ليلي,تلك الساحرة  الجميلة,عرف اسمها من نداء اصدقائها لها, يبدو ان لها أهتمام خاص

بين اصدقائها,كيف لا و لها تلك الضحكة  الاسرة , يراها وحدها من بين زحام الناس حولها,لا يقوي علي ان

يتوقف عن النظر إليها , النظر فقط,رغم  نصيبه الضئيل من التعليم فهو أذكي من ان يطمح ان تبادله ذات

الاهتمام,و لكن يبدوا انها بدأت تلاحظه,مؤخرا  بدأ يلاحظها تبادله النظرات من جانب عينها,فيهرب سريعا

ناظرا في اتجاه اخر,هل نظرتها نظرة فضول ام  استنكار,ظلت تسأل بعينها عدة مرات,ماذا لو كانت

مهتمة,ها هي خارجة و صديقتها من (صالة 2) ,التقت عينه  بعينها مرة اخري , هذه المرة لن يهرب, فهي

التي بحثت عنه,انها تسير نحوه, هل هي غاضبة ام مهتمة,اقتربت  منه و مدت يدها اليه,فمد بدوره يده,تركت

في يده ورقة و اكملت سيرها و صديقتها إلي باب الخروج,نظر الي  الورقة ليجد الرسالة "عد إلي الأرض"

او بلغة البشر"البنك المركزي المصري,خمسة جنيهات" , لم يتمني  ان(تنشق الأرض و تبلعه) كما سيتمني

اي شخص في لحظة مماثلة,و لكنه تخيل ذلك الرجل القعيد (أكس) ياتي  نحوه ليقول له انه يستطيع التحكم

بالنار او ان عنكبوت تعرض لشعاع نووي هبط من السقف ليدب انيابه في  عنقه,لحظة فارقة,قصة

اخري,فيلم مختلف

*****************

ليلي - محمد  منير

http://www.youtube.com/watch?v=vwUuks-rXps

زلابية 3 , زلابياية واحدة بالفراولة

ملحوظة: مفيش مانع من شوية هزار رغم النكد , احنا الشعب القاوم الأحتلال بالأغاني , و احلي نكتنا بتتطلع من المصائب

الأغنية دي ممكن تسمعها و انت بتقرا

 

 john mayer ...please dont sue me u r the best :) 
**********************

الفالانتاين ,يوم جميل بيمثل بالنسبة لي حاجات كتيرة , بيمثل العيد الكبير لواحد نباتي او الهالووين لواحد.... مصري  .اصلا كل قصصي العاطفية قصة واحدة اتكررت كام مرة ,(اعجاب غير متبادل ينتهي بنهاية مأساوية) , زي مثلا و انا طفل , كالعادة بنت الجيران ,اكيد مكنتش بحبها في السن ده ,بس كنت في السعودية , يعني هي البنت الوحيدة في المحيط و المحيطات المحيطة بالمحيط , المهم مرة كنت بلعب بال....جزمة ام عجل ادام البيت , و انا كنت جامد بالبتاع ده اوي و انا صغير, نط علي السلالم و ريفرسات و كده ,و لمحتها خارجة مع باباها و المسافة كافية و قررت ان دي فرصتي للأبهار و.......ء

درس1: العجل اتعمل عشان العربيات , و الجزم للرجلين , لما يبقي العجل في رجلك , متسخنش اوي

علي ما فقت من الوقعة كانت مشيت , قبل ما افوق ماشفتش حاجات كتير بس سمعت ضحك كتير

او  كالعادة برضه في ثانوي , مشكلتها ببساطة ان كان بيشاركني الأعجاب بيها اكتر واد مزة في الفصل ..... في المدرسة

درس 2 : لو هتصطاد تأكد من كفاءة المنافسين

المشكلة الأكبر انه كان صاحبي

درس3 :متصاحبش الواد المزة , مش عشان انت وحش , (سبايدر مان ) جامد بس عمرك ما هتشوفه بيتمشي مع (هالك) , هيفعصه

بس كده ,مفيش قصة تتحكي ,الصراحة الراجل مباعنيش في حاجة , كان ماتش نضيف جدا , لكن الطبيعة خدت مجراها

حاجات زي كده , مفيش تجربة كاملة افهم منها ,و عشان كده يفضل في دماغي نفس السؤال ,هي إيه الطريقة الصح , يعني لو واحد اعجب بواحدة يعمل إيه؟يقرب ازاي؟ في إيه في دماغ البنات

What do women actually want?

في مرة فعلا قررت اسأل ماما , القاعدة معروفة , متسألش اهلك في الحوارات دي , لكن ماما مختلفة , ست مثقفة و الأهم انها طبيبة نسا , اكيد كلامها هيكون مفيد , دخلت المطبخ

ماما , هو و لو انا معجب ب...........ألخ ؟

هي تقديرها إيه ؟

تقدير مين؟ و بعدين إيه علاقة التقدير بالموضوع , هو انتي يعني سألتي علي تقدير بابا لما اتقدملك؟

يعني انت الجبت تقدير باباك عشان تتكلم ؟ بقولك إبه يا محمد تعرف تقولي ال

contraindications of cesarean section ?

علي فكرة انتي قديمة اوي ,الكلام ده كان السنة الفاتت

بابا دخل المطبخ

صوتكوا عالي ليه ,في إيه؟

ابنك عايز يتجوز

نعم؟ انا قلت الكلمة دي خالص؟ هو ان لاقي اكل اساسا

ء(بهدوء الجراحين) قول لي يا محمد , تعرف إيه عن ال

Complications of hernia?

شوفي الأسئلة , الله ينور عليك يا بوب , دي خدتها السنة دي , سلامو عليكو

درس4:زي ما قلنا متسألش اهلك , هتبقي طمعان فيهم و عايز تتجوز

درس5:خارج الموضوع , اوعي تدرس دراسة اهلك , عارفين كل حاجة , عارفين انت اخدت إيه و فاضلك إيه و في صفحة كام , و اي حوار هيتحول بقدرة قادر لأمتحان شفوي

اجابات اصدقائي كانت مختلفة شوية ...ء

البرنس : "انت لازم تحب نفسك اكتر من كده" و اداني محاضرة عن ان ربنا خلقنا عشان نعمر الأرض و ان الأسرة هي الوحدة البنائية ......الخ

البرنس الزملكاوي : يا ابني فاكس جو اعجاب و حب و الكلام الفاضي ده , خروجتين و سينما وكده , خليك سريع و انجز

البرنس التخين : بص يا مان , انا رأيي ان الصراحة احسن حاجة ,احسن ما تفضل متعلق, قولها عشان تقلبك و تخلص

Life is to short to safely remove usb drive

البرنس السلفي : حراااام

درس6:متسألش صحابك

درس 7:متسألش حد , اتعامل مع نفسك

عموما انا مالقيتش اجابة لأسئلتي حتي الأن,رغم كده انا مش ضد الحب,بالعكس و الله, اي حاجة بتتعمل بحب بتطلع احسن,في اعتقادي ان حتي العبادة-خوفا من الله عظيمة طبعا-بتكون اجمل لما بتبقي حبا لله,فاليعرف يحب يحب يعني ,ده يبقي استاذي كمان,الحب حاجة كويسة عموما ,و مفيش مانع كمان نحب اهلنا و اصحابنا و شغلنا و بلدنا و الأهم ......نحب نفسنا

u r welcome to share ur insights and opinions about the issue , especially girls ;)

 happy shalantine  DAYZ all :):):)

Hitch(2005)

زلابية 2 .... زلابيات من الميدان

ملاحظات من احداث محمد محمود و مجلس الوزراء:

-الناس واقفة طوابير عشان تتبرع بالدم , بعد الاستغاثة بيوم  و نص بنوك الدم اكتفت,البلد دي هتفضل بخير, بأهلها 

- راجل عمره ميقلش عن 50 سنة طالع من محمد محمود بعكاز و مش قادر يمشي , بعد الكشف عليه عرفنا انه عمل عملية في ركبته قبل الثورة , و اتصاب فيها تاني في موقعة الجمل و عمل عملية, و جه يتصاب فيها تالت النهاردة , الثورة مستمرة فعلا

- باستبعاد فرق المساحة بين الميدانين , بالعقل كده ,متظاهر ضد قوة كبيرة , نازل و عارف انه ممكن ميرجعش لأن في ناس قبله مرجعتش يساوي معنويا كام واحد من متظاهرين نزلوا مع القوة دي و في حمايتها ؟ الواحد بعشرة مثلا ؟

-طيب ثوار التحرير نايمين ادام عجلة الانتاج موقفينها , سؤال بسيط , ثوار العباسية الأبرار-مع احترامي- قاعدين عند البوجيهات  و لا إيه بالظبط عشان انا مش فاهم مكنة الانتاج المصرية؟

- بالنسبة للعجلة , تكلفة قنابل الغاز المتنوعة و المطاطي و الخرطوش ال(اتنفخنا) بيها كان ممكن تنفخ كام عجلة

- عشان مكونش بلطجي هعمل عملية تجميل عشان اشيل اثار الحبوب , و واحدة تانية عشان العلامة بتاعت لما وقعت من علي العجلة , و كمان واحدة ابيض وشي بالمرة زي مايكل جاكسون , و هشتري كل هدومي من (اديداس) , المشكلة ان بعد التعديلات دي هبقي (ممول) ؟؟؟؟

-انا بلطجي و عايز اخرب مصر و اضرب المجلس في مقتل , و معايا ملتوف, بالعقل كده ارميه علي مبني انا واحد من الناس بعدي ادامه يوميا بقالي 6 سنين و للأسف مكنتش اعرف انه المجمع العلمي و لا ارميه وراية علي (الجامعة الأمريكية)

-اليجيب السكر ان من كام سنة مجلس الشورة الجنب المجمع بخطوتين طفوه بهليكوبترات اطفاء , اليجيب الضغط ان نقطة اطفاء التحرير قدام المجمع علي الرصيف التاني يعني بنتكلم في 15 متر مثلا , اليجيب الجلطة بقي ان حسني من كام سنة بعت طيارات اطفاء عشان تطفي حريق في غابة في اسرائيل ,اليجيب ....... ان انا بتكلم عن حريق مبني قصاده اولاد اتيتموا و ستات اترملت و امهات قلبها اتحرق و بنات اتضربت و اتعرت , يغور المبني بالكتب الفيه

- جدار في القصر العيني , و جدار في محمد محمود , و جدار في الشيخ الريحان ...... حصار ام حماية , حماية إيه من إيه ؟؟

- انا كنت واحد من الناس , مبزعلش اوي هدخل الجيش –او (هلبس جيش) كما هو التعبير الدارج- عطلة و وقف حال بس واجب لازم نعمله و نتشرف بيه كمان, عشان صورة الجيش في عقلي كانت جنود بيرشوا ميه علي الساتر الترابي و مية القناة لونها احمر من الدم , لكن الصورة دلوقتي بقت جنود بيحدفوا طوب وجنود بيعروا بنت و جندي بيضربها بجزمته بدقة علي الجزء العاري من جسمها و اخر (بيرش) مية علي الناس, ده الموضوع رخص قوي

-ايوة عادي يعني , هناخد نفسين الغاز  و نطلع نجيب بجنيه لب , حلاوة روح , و ممكن بطاطة أوكشري او فشار او درة او رز بلبن عليه بسبوسة او..... زلابية

-الشيخ الجليل يقول انه يشم رائحة الجنة في الميدان , و يرفع الله روحه إليه في الميدان......صدفة ؟؟

-عمري ما هفقد الأمل في الثورة ,مرة كنت باسأل والدي عن حياته في سنوات النكسة , اكتشفت انها بالنسبة لي حاصل طرح 1967 من 1973 , تاريخين مكتوبين في كتاب , لكن بالنسبة للجيل ده 6 سنين , باليوم بالساعة , احساس بالأحباط و الهزيمة رغم كده رغبة في العمل , اعمار الشعوب بتتعد بعشرات و احيانا بمئات السنين , و الكان فاكر ان الموضوع هيخلص في ايام او كام شهر يبقي غلطان,الثورة مستمرة

اذا اعجبتك مش مهم تعمل (لايك) او تكتب (كومنت) , المهم تنزل الميدان النهاردة , و اذا معجبتكش برده يا ريت تنزل