أزاي تكوني محترمة-pepper spray society :)

كنت ماشي في الشارع انا و قريبتي بعد ان زرنا احد اقاربنا الذي كان قد خرج من المستشفي , كنت في
حالة نفسية جيدة حيث اننا اطمأنينا علي المريض و كان اجتماع عائلي لطيف , و انا رايح للعربية و سابق بكام خطوة عشان افتح العربية-لادا بلا فخر- , مر جنبي شاب حسيت لسبب ما انه هيصدر منه تصرف سخيف و في نفس اللحظة بصيت وراية لقيته بيعاكس قريبتي , فما كان مني غير اني زعقتله -رجولة مش كده؟- و توجهتله علي اساس اني ابدأ امد إيدي و لكن قريبتي مسكتني بمعني (خلاص) و حصلت معركة سريعة في رأسي بين (انا الغاضب) ضد (انا الخائف) و (انا العاقل) كان نتيجنها انتصار سهل للأخيرين , فقررت الأنسحاب و الرجوع للعربية .


قعدت في العربية و الراحة النفسية المذكورة سابقا طبعا راحت , (انا الغاضب) استلمني بلا رحمة , احساس بغضب و ذنب شديد , افكار تتضارب في رأسي , هل تصرفي هو الصح ولا كان المفروض اتخانق معاه خاصتا انها كانت هتبقي معركة لصالحي , مش بدعي اني خمس رجالة في بعض لكن ببساطة ان انا كنت ادام بيت جدي , يعني لو كنت عليت صوتي كفاية كانت نص العيلة زائد جمهور القهوة التحت البيت كانوا هيقوموا بالواجب , المهم اني تقريبا توقفت عن الكلام و حاسس بمرارة شديدة.

قريبتي حاولت تتكلم معايا عن ماتش مصر الكان بعد ساعات و مكنتش برد فكان منها كمحاولة لتهدئتي انها تقولي ان المواقف دي بتحصل بمعدل مش قليل - لا كتر خيرك انا كده هديت فعلا- .

المهم اني في اي حديث مع شاب من النوعية دي - ساعات الحياه بتجبرك تعرف اشكال......- تلاقيه بيبص علي البنات في الشارع و يدي نفسه الحق يقول ان دي مش محترمة حكما علي ملابسها الفي معظم الأحيان بتكون عادية جدا و ممكن احيانا تكون البنت دي محجبة, لا و كمان يقولك ان فلانة دي متتجوزهاش , دي تمشي معاها بس , الموضوع بالنسبة له قفص طماطم , دي تشتريها لكن دي اخرها تسرقها مثلا , و طبعا لو كلمته في قصة "الطيبون للطيبات" و انك انت لازم تكون محترم برده ممكن يتسبلي حاجات كتير و هبقي فرفور و مش راجل .

المحبط في الموضوع ان الحيوانات دول بيتحسبوا علي المحترمين -ولاد الحرام مخلوش لولاد الحلال حاجة - بمعني ان لو واحد محترم اعجب ببنت و حاول يقربلها بطرق "محترمة" هيواجه بتصرفات عدائية و رفضية لأنه غالبا حيوان من ضمن الحيوانات و علي رأي ويل سميث

"because of pigs like vince munsen , great guys like breneman doesn't have a chance , because of them I have a job...had a job " - Hitch (2005)

I love the ladies

انا بعترف , لكن في نفس الوقت بحترمهم , اكيد بتلفت نظري بنت شعرها جميل او عيونها جميلة , لكن برده بتسحرني بنت شخصيتها مرحة او تفكيرها مبدع , بشوف البنت علي انها "انسان" له عيوب و مميزات مش "شيء" جميل او عادي و خلاص .

و علي هذا الأساس انستي انا بدعوكي انك لو قابلتي اي شاب في اي حتة - باستبعاد إذا كان محترم او غير كده - اتعاملي معاه بأسوأ طريقة ممكنة لأنه غالبا حيوان من ضمن الحيوانات-يعني خلي ال(ببر سبراي) في الشنطة علي طول-  , لأنه في مجتمع مهما عمل في حياته هيفضل شخص محترم لا يعيبه شيء , لأنه عمره ما هيخضع لأي تقييم من الأنت بتتقيميه , لأنه لو ارتبط بواحدة مأظنش ان والدها هيمشي يسأل اهل منطقته و المحلات الفي الشارع عن اخلاقه و سلوكياته - العكس بيحصل والله في اوساط كتير - , او علي الأقل عشان لو معملتيش كده في نظر مجتمعنا مش هتكوني .....محترمة