زلابية !!!!!

دول كام (فيسبوك ستاتس)  كنت هكتبهم في رمضان ...... و قررت اكتبهم في الكراسة

......

مكتبتهمش علي (الفيسبوك ليه)  ليه ؟

عشان الكمبيوتر بتاعي اتحرق , بجد طلع دخان و بشحت لابتوبات اخواتي من وقت للتاني, و عشان عجبتني فكرة الكراسة و اتحولت لشبه مذكرات  , حاجات كده يعني

طب منزلتش  في رمضان ليه ؟

لا , مكنتش في المود خالص , لظروف سيتم ذكرها لاحقا

طيب بتصدعنا دلوقتي ليه ؟

العيد فكرني بالموضوع , فراغ , عموما شكرا علي العشر دقايق الجايين الهتضيعهم معايا , نورتني فعلا

-بكرة اول يوم رمضان , رمضان في مصر حاجة مختلفة ,الفوانيس , محلات فول بتحتل الرصيف قدامها , السحور الأول مع الصحاب , قعدة متتعوضش , خاصتا لو غسيل البلكونة الفوقينا بينقط , غسيلهم بنطلونات و شورتات بس , مبيلبسوش حاجة من فوق , (هادي) بيقترح ان دي شقة فريق سباحة .

-طيب يا جماعة , انا مسافر الحجاز النهاردة , هتوحشوني تنين , لكني مش قلقاااااااااااااان ,تذكرتي رااااااايح جاي  

-قشطة جدا , المغرب بيأذن هنا قبل مصر بنص ساعة......يا جعانيييين

-هل يجوز اني ادعي ان واحدة تحبني ؟ عموما دعيت ولا مدعيتش هو في حاجة هتستخبي علي ربنا

-غريب شوية رمضان بتاع الأجازة ده , فين زمان لما كنا نروح المدرسة بدري , و نقعد نقرأ قرأن في الحصة ......في  رمضان و بنقرا قران يا مستر (مش عاجبك..اعترض بقي) .....و تيجي حصة الألعاب و نلعب كورة كتييييير !!!!!

-جامد اوي التتر بتاع (شارع عبد العزيز) , ازاي تواشيح و اغنية شعبية يتعملهم توزيع روك .....أبداع

-بابا بيكره الأشارات جدا , و لا يعترف بالضوء الأصفر ,السوبر ماركت علي بعد  نص ساعة ,بس احنا هناخد الدائري , كلها ساعة و نص .....بس من غير اشارات .

-السوبر ماركت هنا معظمها زي كارفور كده ,مساحة شاسعة , الرز مثلا بيتباع بالشوال 5-6 كيلو ,و مش علي رفوف , مربع علي الأرض نقول 3*3  متر و ارتفاع متر و نص , و الناس بتاخد بالخمس اشولة , 16 كاشير كلهم قدامهم طوابير ,الناس بتشتري اي حاجة بأي كمية ,خرجنا اخيرا و ركبنا العربية , شغلت  الراديو ......"الصومال تستغيث , أغيثوا الصومال "

-ماما لسة ماجتش , هتحصلنا بعد اسبوع كده , اختي البتطبخ دلوقتي ,اكلها حلو بصراحة , بس لما بتطبخلنا بحس انها كاسرة عيني , انا باكل و انا خايف

-هييييه , ماما جت , طعام لا يتبعه من ولا أذي

-عادي ان بابا يبقي واقف في المطبخ , و عادي اكتر انه يبقي بيعمل زلابية (لقمة القاضي في ثقافات اخري),لكن المش عادي انه يكون بيعمل تجارب علي الزلابية , و مقسمها مجموعات ......

زلابية 1:عليها فانيليا

زلابية 2: بدون فانيليا

زلابية 3: عليها نشا , عشان تقرمش

زلابية 4 :عليها كاستر , عشان تبقي صفرا

زلابية 5: معليهاش حاجة

بس طلعوا حلوين في الأخر ,تسلم إيدك يا بوب

-الهم ارزقنا دولة يعز فيها شأن اهل الطاعة.......اااااامين.....ويذل فيها شأن اهل المعصية......أأأ.....مش عارف , طيب ما نقول ربنا يهديهم احسن , ليه الذل ؟

- فعلا كنت هعيط لما الكبير عمل اخر تاتش داون ......و الله و عملوها الرجالة

-عايز اسجل اعجابي بذكاء صناع اعلان (كوتونيل),هو الهدف من الأعلان إيه ؟ ان الناس كلها تبقي بتتكلم عن المنتج , و ده الحصل , حتي لو بمنتهي الأبتذال و حتي لو هيكرهك في  صحابك  و يحولهم في ذهنك ل......كاروهات و مخطط و كده .

-و بعدين بقي ,بقينا نص رمضان و النتيجة مطلعتش , عايزين ندعي بحاجة تانية

-النتيجة طلعت , زهرة بيجيبهالي , ربنا يستر

-درجة يا ولاد ال........, الواد زهرة ده فقري , بس هو جابلي نتيجة السنة الفاتت و كانت كويسة , احنا اسفين يا زهرة .

- عبد الحميد –صديقي الصدوق قوي يعني- بيقوللي كنوع من التشجيع "اعتبر سقوطك في النسا جزء من فشلك العام في الحياة مع النسا"

-بما ان في مذاكرة دلوقتي , أضطريت اغير المسجد ,هروح للشيخ محمود عشان بيقصر , مضطر و الله, سعودي من اصل موريتاني , لهجته غريبة جدا , مش فاهم من الدعاء اي حاجة .....اااااامين , اكيد بيدعي بحاجات كويسة

-ربنا يخليه و كل حاجة , بس مش لازم يعني كل يوم ندعي للملك .......و ولي عهده ........و نائبه ......و نائبه الثاني ........و وزرائه ........و بطانته ....الخ

-عاااااااش يا ليبيا , هو ده الكلام الصح , بلا سلمية بلا كلام فاضي

-اخواني الليبيين , خلصوا عليه هو و عياله من دلوقتي عشان المحاكم حبالها طويلة , و تلاقي فلاشة متبرشمة و يقولك احراز و حاجات كده

-مطار جدة , 2 كاونتر ل300 هندي , 2 كاونتر ل200مصري , 3 كاونتر ل50 سعودي , العنصرية ....لا دين لها

-انا في الطيارة راجع مصر , احساس بالسعادة ,اهي مصر دي اكبر دليل علي ان الحب ملوش علاقة بالشكل ,بنحبها بالزحمة و الدوشة و المشاكل  و المباحث ......ألخ

بس كده

<photo id="1" />

اسئلة طائفية مغرضة تودي في داهية

انا ضد اي اعتداء علي شخص مدني بغض النظر عن دينه او عرقه , و بطبيعة الحال انا ضد الاعتداء علي اي شخص بسبب دينه او عرقه , مش هتكلم هنا عن احداث امبابة لسببين , اولهم اني لا اعرف التفاصيل  و انا مقصدش تفاصيل التلفزيون , اقصد تفاصيل من رئي و من حقق , ثانيا , دايما لما بتحصل مشاكل من النوع دا بفتكر الأسبوع لو كانوا المسلمين او الأخوان او السلفيين عايزين يحرقوا كل كنائس مصر كان حصل و العكس صحيح , و لو الأهلوية كانو عايزين يحرقوا نادي الزمالك كان تم ,عادي جدا , انا اصلا عندي رأي شخصي ان مصر مفيهاش فتنة طائفية , او مكانش فيها , الفتنة الطائفية اكذوبة اخترعها النظام السابق , زي ما شركات الأدوية بتصنع الفيروس و تصنع العلاج , و الثورة المضادة بتستخدم الأكذوبة دي دلوقتي , ان مش محلل سياسي او اجتماعي , لكن اظن لو مصر كان فيها فتنة طائفية مكانش جدي شارك اعز اصدقائه (المسيحي) في مشروع كلفه كل فلوسه تقريبا , يعني كان يبقي صاحبه بس ميشاركوش في فلوس ولا إيه ؟

لكن انا عندي شوية اسئلة :

ليه لو انا سرقت واحد مسيحي الصحافة هتكتب (مسلم يسرق مسيحي) لكن لو انقذته من محاولة سرقة هتتكتب (مواطن ينقذ مواطن) ؟ ليه بقينا بنروج للأفكار الأخترعها جورج بوش الأبن ان مسلم تساوي ارهابي مع فارق بسيط ان اصبحت سلفي تساوي ارهابي , مع العلم ان السلفية هي الأسلام لأن معني كلمة (سلفية) هو اتباع السلف أي القديم أي سنة سيدنا محمد (ص) و صحابته رضي الله عنهم .

ليه اليحرق اي منشأة او يأذي اي حد ميتعاقبش علي الجريمة بغض النظر عن دين المعتدي و المعتدي عليه؟

ليه و انا واقف مع صاحبي المسيحي حاسس من جواية اني متهم , رغم اني معملتش حاجة , بل انا ضد اي اذي ليه بسبب دينه , لأن الأذي لشخص بسبب دينه اهانة للأنسانية , بلاش ,خليني اناني اكتر شوية , لأن اهانة مسيحي بسبب دينه في مصر زي اهانة مسلم بسبب دينه في اوروبا او امريكا .

ليه ريم ماجد – انا بحترمها و بحب ادائها علي فكرة- تقول بأستنكار شديد ان اسامة بن لادن صلوا عليه صلاة الغائب و الشيخ اسامة القوصي –مع اعجابي و احترامي له ايضا- يقول ان الصلوا دول متخلفين ؟

انا بكره اسامة بن لادن, لأن و لتاني مرة انا ضد قتل اي مدني لأي سبب كان – إذا كان هو العمل كده – و لأن افعاله او الأفعال النسبت إليه ضرت المسلمين في العالم كله سنين عديدة و لكن في النهاية اسامة بن لادن مسلم , له حق ان يدفن و يصلي عليه , زي اي مسلم محكوم عليه بالأعدام , و لو كان قتل نفسا بغير حق فأظن ان الله سبحانه و تعالي قادر علي ان يقتص منه خير القصاص.

ليه وصلنا لدرجة اننا بنعمل دعاية ان الأسلام بريء و حلو و أعلانات زي "الأرهاب لا دين له", بنعمل دعايا لدين "لكم دينكم و لي دين" و "من قتل نفساً بغير نفس أو فساد في الأرض فكأنّما قتل النّاس جميعاً ومن أحياها فكأنّما أحيا النّاس جميعا " , دين كانوا اهله زمان – الهم السلف- كانوا حتي في الحرب عندهم اخلاقيات , مبيضربوش حد في ضهره و حتي في حروب القبائل كان لو قائد قبيلة راح يحارب قبيلة تانية و لقاه مش جاهز , كان بيقوله هرجعلك بعد شهر عشان مش من الفروسية انك تقهر عدو في ضعفه .

ليه قربنا نوصل لدرجة ان و العياذ بالله هنخجل من ديننا , و لو واحد مسافر بلد اجنبي و اسمه يوسف هيبقي (جو) او (جوزيف) عشان يستحسن يداري دينه , و لو اسمه احمد او محمد تبقي مصيبة ؟

انا اسمي محمد , انا مسلم , بلبس تي شيرت و بنطلون و بحلق دقني , مش عارف انا كده سلفي ولا لأ بس انا بتبع سنة سيدنا محمد (ص) و الصحابة رضي الله عنهم , بأستبعاد الجماعات السياسية البتسمي نفسها بالأسم ده , انا بتكلم عن معني الكلمة في القاموس, انا نفسي اليقتل او يحرق او يهد يتعاقب , باستبعاد دينه ,عشان المسيحيين عايزين حقهم , و عشان الأسلام اتبهدل مع الميعرفوش عنه حاجة اليومين دول , ولا إيه ؟ انا بسأل

ً

كوابيس مضادة للأشتعال

ملحوظة: الكلام الفاضي ده اتكتب قبل الثورة بكام يوم

كنت قاعد علي السرير بتفرج علي التلفزيون , القناة كانت الجزيرة , بصراحة مكانتش طالبة , بس انا كنت تحت اللحاف و الريموت بعيد و الجو برد , لسة هقوم اجيب الريموت و ارجع تحت اللحاف و علي ما ادفي تاني فيها يجي ربع ساعة , المهم الأخبار كلها كانت عن شباب بيحرقوا نفسهم في جميع انحاء الوطن العربي , (عاجل) شاب مصري يحرق نفسه امام مجلس الشعب و وزير الصحة يزوره في المستشفي , انتو مجانين يا جدعان الحصل في تونس ده مستحيل يحصل عندنا , بدأت امل من الحوارات دي و دخلت في النووووم...... (و تخيل الصورة بتلف مع فادينج زي لما البطل بيحلم في الأفلام )ه

كنت ماشي في شارع القصر العيني راجع من الكلية و انا ماشي قدام مجلس الشوري , فجأة لقيت شاب بيزعق (كفاااااااياااا......حراااااااااااام) و قام دالق علي نفسه بنزين و طلع ولاعه و ولع في نفسه , و في لحظة كل الكاميرات العليها مسدسات اتوجهت عليه و بدأت ضرب ......مية,و يجي عشرين عسكري طلعوا يجروا عليه بمسدسات .....مية و هات يا ضرب ....ميه و بعد كده تلطيش لحد ما الأسعاف وصل .

-كنت قاعد انا و اصحابي في كرنيش ابو الفدا في الزمالك , و للميعرفش كرنيش ابو الفدا ده شارع ضلمة بيطل علي النيل كل الفيه (كابلز) او ناس بتحشش و شوية ناس ضالة بتحب النيل و الهدوء , و كالعادة عدي عليه يجي 3 شباب يسئلوني إذا كان معايا بفرة , و فجأة مكروباص ازرق دخل الشارع , نزل منه راجلين شكلهم شر , و راحوا علي شلة جنبنا ,

"ايه ده يلاااا" 

"ولا حاجة يا باشا" 

و فتح ايده بالعافية و مسك الجوينت

"ولعت أزاي ياااد"

"السخان بتاع العربية يا باشا"

و فجأة لقينا شاب بيجري....طلعوا وراه و مسكوه

"أيه الفي إيدك ده يلا "  طاخ علي قفاه

"ميريت اصفر والله يا باشا "

"افتح الشمال يااااد" طاخ علي وشه "إيه ده ,مشط كبريت , نهار الجابتك مش فايت ,ارمي الكلب ده في العربية " و ركبوا العربية و مشيوا

-داخلين الأستاد نشوف ماتش الأهلي و الزمالك , اتفتشت و انا داخل , مفيش حاجة , الموبايل في جيبي اليمين و ال(سويس نايف) في جيبي الشمال , عديت و بعد ما مشينا شوية لقينا واحد ورانا عند التفتيش بيهروه ضرب.....يا تري لقوا معاه إيه؟

المهم الأهلي كسب كالعادة و طلعنا نرش مية في الهوا و زيطنا !!!!!!

لما روحت بتمشي في شارع مصدق و لقيت عند 

Kitchen store

Special offer up to 50% :

1-electric heater 2 stations  5000 L.E

2-micro wave oven             16000L.E

3-electric oven                    20000L.E

العمارة البعديه كانت بتتبني و الغفير كان قاعد بيتدفي قدام لمبة 100 وات , و (كيتل) الشاي بيغلي جنبه !!!!!!

و صحيت من النوم , مذهول , عرقان و عطشان جدا , رحت المطبخ اشرب

ماما: "صح النوم يا استاذ , هتذاكر امتي و هتنام تاني امتي عشان تروح ال.......الخ

و لقيتها بتدوس علي زرار في البتجاز و بدأ يتك.....تك......تك...تك......و لأاااااااااااااااااااااااااااااا!!!!!!!

و بعد التهريج , ادعو الله ان يرحم شهيد الأمة العربية (محمد البو عزيزي) , اللهم ارحمه بقدر ما كان موته هو الوقود الذي أضاء شعلة الحرية في الوطن العربي  

لعله يرضي-قصة قصيرة جدا

صحوت من نومي اشعر بصداع شديد , السماء ملبدة بالغيوم و الجو مترب,

نظرت إلي نفسي في المرآة ,لماذا يحبني من يحبني,

فلست اري هنا ما يستحق الحب,ارتديت ملابسي و نزلت إلي الشارع ذاهبا  لكليتي ,

كان هجوم التراب و الدخان علي  رئتي يشعرني بأختناق شديد , أختناق شديد رغم البرودة الشديدة ,

وصلت للمحاضرة متأخرا بعشر دقائق تقريبا ,كم هو ممل هذا المحاضر ,

اشعر كأني ضغطت علي زر التشغيل في مسجل به شريط فارغ , كم هي مملة تلك الكلية ,

كم هي مملة تلك الحياة , و انتهت المحاضرة بعد ساعة و نصف مرت كأنها عشر سنوات ,

فتوجهت لمحطة قطار الأنفاق لأعود للبيت و أنهي يوم لم استفد منه بالمرة , كم اكره هذا القطار ,

نهرب به من زحام فوق الأرض إلي زحام تحتها , مئات من الوجوه الكئيبة المرهقة تتزاحم في صندوق معدني لا يفصل بينهم سوي قطرات عرقهم حتي في وسط الشتاء في مشهد يذكرني بعلبة سمك "التونة" ,

و عندما كنت منتظرا علي الرصيف , رأيت تلك المرأة تحمل ولدها , كان لا يقل في عمره عن العشر سنوات ,

لا بد انه مصاب بمرض ما سبب له هذا الشلل فصار عاجزا عن المشي,

عاجزا حتي عن حمل رأسه, و صارت مجبرة علي حمله طوال الوقت ,لا بد انها تكره يوم ولدته , لابد انها تكره يوم تزوجت بالأساس ,

لا بد انه ثقيل جدا عليها , فهاهو ينزلق من بين يديها , فرفعته إليها لتتمكن من حمله , فضحك ,

فما كان منها إلا ان قبلته و ضمته إليها في حنان, نظرت إلي نفسي في زجاج القطار  ,

فشعرت بخجل شديد ,فأستغفرت ربي ,

لعلي ارضي , لعله يرضي .

ثورة الفيس بوك

مقدرش اقول غير ان الحصل في تونس اهم حدث سياسي هياخد مكانه في كتب التاريخ –غير الحروب طبعا- حصل في حياتي او حياة جيلي بمعني اصح ,بجد الف مبروك , و طبعا برامج التوك شو في مصر قسموا صحفيين الأهرام و روز اليوسف علي بعض عشان يطلعوا يقولوا ان الشعب ده هينهار و هيجوع و هيضيع وكلام من عينة "انا متنمناش كده لبلدي ابدا" , لكن سيبك, الناس دي جامدة و هيعملوا الهم عايزينوا إن شاء الله , طبعا  الفيس بوك اتقلب و دعوات للتجمع و جروبات و دوشة , لكن اظن ان حاجة زي دي صعبة علينا شوية ,

ليه بقي؟؟؟؟

اسباب استحالة ان يحصل في مصر زي ما حصل في تونس علي الأقل دلوقتي :

ه1-لأن كتير من طبقة الشعب المصري الممكن تكون سبب في التغيير مقتنعة لسبب ما ان الحكومة الحالية احسن حكومة و شوية كمان شايفين ان (النعرفه احسن من المنعرفوش) و الشوية الفاضلين السياسة مش في دماغهم اساسا.

ه2-اما الطبقة التانية و دي صغيرة لكن نسبة  من 80 مليون تبقي كبيرة , دول بقي هيخافوا علي امكانياتهم والتساهيل و السلكان ليروحوا لو راح الفساد , يعني الوضع القائم مصلحة ليهم , و دول هتلاقيهم بيقولوا (احسن حاجة الأستقرار).

ه3-ثالثا و ده اهم سبب ,ان حكومتنا ممكن تكون دكتاتورية اكتر من حكومة تونس , لكن اكيد أذكي منها , يعني حكومة تونس كان عندها (وحش) مكتفينه بحبال و قيود حديد و قاعدين يضربوا فيه , لكن الوحش ده في لحظة قدر يكسر القيود دي و يبقي حر , لكن مصر فيها (وحش) يمكن يكون اقوي و اكبر, لكن سجانه مش مقيده,هو بس حابسه في مبني واسع حيطانه حديد ,يرمح و يخبط فيه براحته لكن من غير ما يخرج منه,يعني حرية رأي زائفة و مظاهرات و اعتصامات كل يوم لكن محدش بيسمع حاجة ,سياسة سيبهم يهللوا اهو يخرجوا الكبت,و المشكلة كلها في الكبت طبعا.

ه4-ان احنا كشعب مفتتين بكمية فتن رهيبة, و كلامي مش علي الفتنة الدينية بس,لكن في حاجات تانية اتفه بكتير,و الغريب ان التفاهات دي بتظهر فيها قوة الشعب بطريقة جامدة جدا, يعني الحرب بين (العمراوية) و (التمراوية), و دور علي الفيس بوك هتلاقي جروب اسمه (كارهي تامر حسني علي الفيس بوك),الجروب ده اظن ان مشترك فيه اكتر من 100 الف مشترك , بصراحة انا واحد منهم !!!

اما الحرب بين الأهلوية و الزمالكوية و يكفي اني اقول اني اعرف واحد من التراس الأهلي حكالي ان مرة الأمن منعهم من دخول الأستاد و ضربهم , فقعدولهم علي الأرض في الشارع-اظن صلاح سالم- و وقفوا المرور لحد ما نجوم و نسور جت تعتذر ليهم , .

ه5-ان الوطنية في المصريين مماتتش ,لكن استكمالا لمسلسل التفاهة , اتوجهت في اتجاهات زي (شجع منتخب بلدك,مصر) و الاغاني الأتغنت للأنتصار بقت اغاني حسن شحاتة و رجاله -تحس فرقة مارينز لما تسمع "رجاله" دي- و بقينا نشجع منتخب امريكا –بتاعت العراق- علي منتخب الجزائر عشان اهانوا "كرامتنا",و طبعا الكسبوا واحد زي (محمد عطية) في (ستار اكاديمي) لازم و اكيد يكونوا اكتر من الشاركوا في اي انتخابات في تاريخ مصر,ليه؟, عشان يرفع راس مصر.

ه6-اظن يعني التغيير مبيجيش من علي الفيس بوك , يعني مثلا واحد اسمه (احمد مان عرابي) يعمل جروب اسمها "لقد ولدتنا ماماهاتنا احرار , و النعمة مش هنستعبد بعد اليوم " ولا "لو اشترك خمسين واحد في الجروب دي .... مش هنستعبد بعد اليوم"ه

في النهاية,بفتكر حكايات الكبار عن ايام النكسة, ان الناس رغم الهزيمة و الهجرة كان عندهم روح و قرروا يخرجوا من الهزيمة بشغل اكتر , بحسد جيلهم علي نكستهم لأنها علي قد ما كانت قوية كانت واضحة و معلنة , لكن احنا نكستنا متدارية و مقنعة عشان كده مش عارفين نعملها حاجة .