زلابية 4 - زلابية مسمومة

كنت بقلب في الكراسة لقيت الزلابياية دي , من ايام اللجان الشعبية ,كانت ايام حلوة ,كل شاب فينا عاش حلم مستحيل في أرض الواقع , كل واحد عاش الظابط و البلطجي الجواه في نفس الوقت,تجربة جامدة اتمني انها مترجعش تاني ,بس ممكن ,لسة محدش عرف مين الطرف التالت و الدولة العميقة و حماس و الأمر بالمعروف و الخ

********************************************************

-دلوقتي القوات المسلحة بعتتلي رسالة بتقول بالبلدي (انزل احمي بيتك و الممتلكات الخاصة و العامة) و بعدها بعتوا رسالة (في حظر تجول و الهينزل من بيته ملوش دية) , يعني انا اعمل إيه دلوقتي , امسك (سنايبر) و اقعد في البلكونة ؟؟؟

-"طيب يا ماما انا نازل"

"مع السلامة"

"قال في ضرب نار في شارع شهاب"

"اه,في واحد من الدقي اتصل علي (أو تي في) بيقول في عربية كيا سيراتو سودة ماشية في الدقي بتضرب نار"

"طيب , ربنا يستر, انا نازل "

"مع السلامة"

نزلت ..... بعد شوية ,كل الناس موبيلاتهم بترن من وقت للتاني  , ماااشي

انا ؟؟؟مفيش ,طب اتصل انا

"الو , عاملين إبه"

اختي :"كلهم نايمين و انا تقريبا نايمة" ء

الناس دي لقيتني علي باب جامع ؟؟؟؟؟

-الناس بتضرب نار تفاريح , فعلا في واحد ضرب خمس طلقات رصاص حي عشان يصطاد عرسة

-مشكلة لما المنطقة بتعرف انك طالب في كلية طب , خلاص , انت في نظرهم دكتور , متخصص في كل حاجة , الأسوأ ان في ظرف كله ذكور زي اللجان مبتتسألش غير عن حاجة واحدة ........ (الصحة الأنجابية) , طيب المثل بيقول اسأل مجرب ولا تسأل طبيب , و انا و الحمد لله لا ده ولا ده,اسئلة كتير بئا ,و لو ربنا فرجها و اتسألت في موضوع تاني بيبئا سؤال واحد ...."يا دكتور , هو إيه الفرق بين الحشيش و البانجو  ؟؟ " , مرة تاني , لا مجرب ولا طبيب

-في حالة تبادل منظم حاصلة في البيت , انا بطلع الصبح اصحي بابا و اخويا يروحو الميدان , يرجعوا بليل اكون صحيت او يصحوني انزل و هكذا , المهم انهم قرروا في يوم يرجعوا من الميدان مشي و بابا انبهر بمنظر اللجان الشعبية فقرر يجاملهم و اشتري كام طبق زلابية من فرن في شارع التحرير و قعد يوزعها عليهم , الأهم ان بعدها بيومين طلع اشاعة ان في راجل بيمشي في الدقي بيوزع علي الشباب بقسماط مسموم ,الحمد لله , جت سليمة

-الناس مرعوبة , خايفة من الأزمة , اكيد المصانع وقفت , طيب لو الكمية الموجودة في السوق خلصت , هنعمل إيه ؟ هنتصرف ازاي ؟ هنموت يعني؟؟ لكن معظم الناس اتصرفت تاني يوم , كل الناس تقريبا نزلت تدور في المناطق المختلفة بحثا عن نوعها المفضل , و كل واحد قعد يتباهي بليل بغنائمه ,الأشتري خمس علب ميريت أصفر من العتبة , و الوحش النزل مخزن في امبابة و جاب خرطوشتين كاملين مارلوبورو ابيض , انا عارف انه كيف و بيذل , بس اني الاقي حد يتكلم عن العيش او الرز , ابدا

-غريب التناقض البتفرضه بعض المواقف , بمعني , لجنتنا لجنة شباب في دقي  ,يعني معظمنا فرافير إلي حد ما, لكن واقف معانة شاب اسمه (محمود)شهير ب(محمود ماسورة) , وافد من بين السرايات , بيقف يبيع عيش يوميا عند محطة المترو , مسجل خطر و الكل عارف , شخص مرفوض وجوده دايما من سكان المنطقة الشيك الحلوين ,النهاردة كلنا عايزينه معانا و لو مشي ربع ساعة الكل بيسأل عليه , كلنا من جوانا عارفين ان ساعة الجد هو الهيفرق , سبحان الله

-الساعة عشرة ,لسة بدري , الشارع عبارة عن نادي اجتماعي , جيل السبعينات و ستينات موجود و بيتناقش في السياسة , الأطفال موجودين و بيعملوا حاجة مش هيعملوها تاني في حياتهم , يعني بيلعبوا كورة في قلب شارع (محي الدين ابو العز) , و تمر الساعات ....و تقل الناس و يوصل الرعب لأعلي درجاته , إلي ان يأتي صوت في ايام كتيرة للأسف مبنسمعوش اساسا , يصاحبه احساس سريع بالدفئ و الأمان رغم البرد الشديد , أذان افجر

-الأشاعات بئا, جميع انواع العربيات بجميع الوانها فيها ناس معاها (ألي) و ماشيين بيضربوا نار في كل حتة ,و عربيات الشرطة و الأسعاف طبعا , احلي حاجة بقي في الموضوع ده خيال الأطفال و هم بيألفوا أشاعاتهم  ,سمعت مثلا ان في أخطبوط عند قسم الدقي , رجليه طالعة في كل في كل الشوارع الحوالين القسم,و في طيارة (اباتشي) بتضرب نار علي نادي الصيد ,حاجات كده 

-بوكس ازرق داخل الشارع , طبعا استوقفه الشباب و بصلنا الظابط الواضح انه علي الأقل عمليات خاصة نظرا لعضلاته

ه"سلام عليكم,عاش اوي يا رجالة ,من بكرة بئا هتطلعوا تناموا في البيت"... محصلش طبعا

و فجأة لقينا (عم احمد) -بتاع الكشك- مسك الظابط من هدومه و هاتك يا تهزيق و الناس تحوش إلي ان تدخل (جان) -بتاع محل الموبيلات-

"لامؤاخذة يا باشا اصله متعصب شوية"

ه"مش أسلوب يعني , و بعدين ما احنا نازلين اهو و بنقول هتناموا " في انكسار

"معلش يا باشا , اصله متغاظ شوية,اشوف بئا الكرنيهات بتاعكوا بعد أذنك كده يا باشا ؟؟"

لسه بيشوف الكرنيهات بتاعنهم و هيعديهم لئينا شاب جاي بيجري من شارع السودان ,"ارجاااالاا , محدش ييجي يقولكوا انا جيش ولا شرطة و تعدووووه , احنا اي حد بيعدي عندنا بنألعه ال...... "   , مش عارف ليه ما شاركتش في المليطة دي ,رغم ان رصيدي من الكراهية و النفساوية يسمح , بس ابئا كذاب لو معترفتش اني كنت مستمع

أظن محدش كان واقف في الشارع و مجوش علي باله

the real street heroes , (ninja turtles) , rapheal  is the best of course :)

*****************************************************

جالاكسي - قصة قصيرة جدا

السينما,ذلك العالم السحري ذو الابواب تطل علي عوالم خيالية, قصص مختلفة و غريبة,اما بالنسبة لمنير لم

تكن  كذلك , فهو ييبيت في ركن صغير بقرب الجراج و يصبح ليزاول عمله في قرية صغيرة منعزلة عن

هذا العالم ,  دورة مياه الرجال, هو ذلك العامل متعددالوظائف,تارة ينطف و اخري يملأ اوعية الصابون و

اخري يقطع  المناديل الورقية لمستخدمي الحمام املا ان يعطيه احدهم عملة اواثنين,لم تكن الوظيفة صعبة ,

فكان الحمام يمتلئ في فواصل الافلام و اغلب استخدام المكان هو التدخين,بعض من معطر الجو بعدعودتهم

إلي الصالة و ينتهي الأمر,في حفلات منتصف الليل كان يتسلل لمشاهدة الأفلام المعروضة,لكن اكثر قصة

كانت تأخذه هي قصة  الفتي العادي المقهور الذي تحدث في حياته تلك اللحظة الفارقة لتصنع منه بطل مثل

افلام الأبطال الخارقين,اما  في الحفلات الأخري كان يقف ليتابع فيلمه المفضل, جمهور السينما,فتيات و

شباب من نفس عمره , يلمعون دائما  بملابسهم الأنيقة و حقائبهم الملونة, يأتون من مدارسهم و كلياتهم , لكنه

كان يلاحظها هي,ليلي,تلك الساحرة  الجميلة,عرف اسمها من نداء اصدقائها لها, يبدو ان لها أهتمام خاص

بين اصدقائها,كيف لا و لها تلك الضحكة  الاسرة , يراها وحدها من بين زحام الناس حولها,لا يقوي علي ان

يتوقف عن النظر إليها , النظر فقط,رغم  نصيبه الضئيل من التعليم فهو أذكي من ان يطمح ان تبادله ذات

الاهتمام,و لكن يبدوا انها بدأت تلاحظه,مؤخرا  بدأ يلاحظها تبادله النظرات من جانب عينها,فيهرب سريعا

ناظرا في اتجاه اخر,هل نظرتها نظرة فضول ام  استنكار,ظلت تسأل بعينها عدة مرات,ماذا لو كانت

مهتمة,ها هي خارجة و صديقتها من (صالة 2) ,التقت عينه  بعينها مرة اخري , هذه المرة لن يهرب, فهي

التي بحثت عنه,انها تسير نحوه, هل هي غاضبة ام مهتمة,اقتربت  منه و مدت يدها اليه,فمد بدوره يده,تركت

في يده ورقة و اكملت سيرها و صديقتها إلي باب الخروج,نظر الي  الورقة ليجد الرسالة "عد إلي الأرض"

او بلغة البشر"البنك المركزي المصري,خمسة جنيهات" , لم يتمني  ان(تنشق الأرض و تبلعه) كما سيتمني

اي شخص في لحظة مماثلة,و لكنه تخيل ذلك الرجل القعيد (أكس) ياتي  نحوه ليقول له انه يستطيع التحكم

بالنار او ان عنكبوت تعرض لشعاع نووي هبط من السقف ليدب انيابه في  عنقه,لحظة فارقة,قصة

اخري,فيلم مختلف

*****************

ليلي - محمد  منير

http://www.youtube.com/watch?v=vwUuks-rXps

زلابية 3 , زلابياية واحدة بالفراولة

ملحوظة: مفيش مانع من شوية هزار رغم النكد , احنا الشعب القاوم الأحتلال بالأغاني , و احلي نكتنا بتتطلع من المصائب

الأغنية دي ممكن تسمعها و انت بتقرا

 

 john mayer ...please dont sue me u r the best :) 
**********************

الفالانتاين ,يوم جميل بيمثل بالنسبة لي حاجات كتيرة , بيمثل العيد الكبير لواحد نباتي او الهالووين لواحد.... مصري  .اصلا كل قصصي العاطفية قصة واحدة اتكررت كام مرة ,(اعجاب غير متبادل ينتهي بنهاية مأساوية) , زي مثلا و انا طفل , كالعادة بنت الجيران ,اكيد مكنتش بحبها في السن ده ,بس كنت في السعودية , يعني هي البنت الوحيدة في المحيط و المحيطات المحيطة بالمحيط , المهم مرة كنت بلعب بال....جزمة ام عجل ادام البيت , و انا كنت جامد بالبتاع ده اوي و انا صغير, نط علي السلالم و ريفرسات و كده ,و لمحتها خارجة مع باباها و المسافة كافية و قررت ان دي فرصتي للأبهار و.......ء

درس1: العجل اتعمل عشان العربيات , و الجزم للرجلين , لما يبقي العجل في رجلك , متسخنش اوي

علي ما فقت من الوقعة كانت مشيت , قبل ما افوق ماشفتش حاجات كتير بس سمعت ضحك كتير

او  كالعادة برضه في ثانوي , مشكلتها ببساطة ان كان بيشاركني الأعجاب بيها اكتر واد مزة في الفصل ..... في المدرسة

درس 2 : لو هتصطاد تأكد من كفاءة المنافسين

المشكلة الأكبر انه كان صاحبي

درس3 :متصاحبش الواد المزة , مش عشان انت وحش , (سبايدر مان ) جامد بس عمرك ما هتشوفه بيتمشي مع (هالك) , هيفعصه

بس كده ,مفيش قصة تتحكي ,الصراحة الراجل مباعنيش في حاجة , كان ماتش نضيف جدا , لكن الطبيعة خدت مجراها

حاجات زي كده , مفيش تجربة كاملة افهم منها ,و عشان كده يفضل في دماغي نفس السؤال ,هي إيه الطريقة الصح , يعني لو واحد اعجب بواحدة يعمل إيه؟يقرب ازاي؟ في إيه في دماغ البنات

What do women actually want?

في مرة فعلا قررت اسأل ماما , القاعدة معروفة , متسألش اهلك في الحوارات دي , لكن ماما مختلفة , ست مثقفة و الأهم انها طبيبة نسا , اكيد كلامها هيكون مفيد , دخلت المطبخ

ماما , هو و لو انا معجب ب...........ألخ ؟

هي تقديرها إيه ؟

تقدير مين؟ و بعدين إيه علاقة التقدير بالموضوع , هو انتي يعني سألتي علي تقدير بابا لما اتقدملك؟

يعني انت الجبت تقدير باباك عشان تتكلم ؟ بقولك إبه يا محمد تعرف تقولي ال

contraindications of cesarean section ?

علي فكرة انتي قديمة اوي ,الكلام ده كان السنة الفاتت

بابا دخل المطبخ

صوتكوا عالي ليه ,في إيه؟

ابنك عايز يتجوز

نعم؟ انا قلت الكلمة دي خالص؟ هو ان لاقي اكل اساسا

ء(بهدوء الجراحين) قول لي يا محمد , تعرف إيه عن ال

Complications of hernia?

شوفي الأسئلة , الله ينور عليك يا بوب , دي خدتها السنة دي , سلامو عليكو

درس4:زي ما قلنا متسألش اهلك , هتبقي طمعان فيهم و عايز تتجوز

درس5:خارج الموضوع , اوعي تدرس دراسة اهلك , عارفين كل حاجة , عارفين انت اخدت إيه و فاضلك إيه و في صفحة كام , و اي حوار هيتحول بقدرة قادر لأمتحان شفوي

اجابات اصدقائي كانت مختلفة شوية ...ء

البرنس : "انت لازم تحب نفسك اكتر من كده" و اداني محاضرة عن ان ربنا خلقنا عشان نعمر الأرض و ان الأسرة هي الوحدة البنائية ......الخ

البرنس الزملكاوي : يا ابني فاكس جو اعجاب و حب و الكلام الفاضي ده , خروجتين و سينما وكده , خليك سريع و انجز

البرنس التخين : بص يا مان , انا رأيي ان الصراحة احسن حاجة ,احسن ما تفضل متعلق, قولها عشان تقلبك و تخلص

Life is to short to safely remove usb drive

البرنس السلفي : حراااام

درس6:متسألش صحابك

درس 7:متسألش حد , اتعامل مع نفسك

عموما انا مالقيتش اجابة لأسئلتي حتي الأن,رغم كده انا مش ضد الحب,بالعكس و الله, اي حاجة بتتعمل بحب بتطلع احسن,في اعتقادي ان حتي العبادة-خوفا من الله عظيمة طبعا-بتكون اجمل لما بتبقي حبا لله,فاليعرف يحب يحب يعني ,ده يبقي استاذي كمان,الحب حاجة كويسة عموما ,و مفيش مانع كمان نحب اهلنا و اصحابنا و شغلنا و بلدنا و الأهم ......نحب نفسنا

u r welcome to share ur insights and opinions about the issue , especially girls ;)

 happy shalantine  DAYZ all :):):)

Hitch(2005)

زلابية 2 .... زلابيات من الميدان

ملاحظات من احداث محمد محمود و مجلس الوزراء:

-الناس واقفة طوابير عشان تتبرع بالدم , بعد الاستغاثة بيوم  و نص بنوك الدم اكتفت,البلد دي هتفضل بخير, بأهلها 

- راجل عمره ميقلش عن 50 سنة طالع من محمد محمود بعكاز و مش قادر يمشي , بعد الكشف عليه عرفنا انه عمل عملية في ركبته قبل الثورة , و اتصاب فيها تاني في موقعة الجمل و عمل عملية, و جه يتصاب فيها تالت النهاردة , الثورة مستمرة فعلا

- باستبعاد فرق المساحة بين الميدانين , بالعقل كده ,متظاهر ضد قوة كبيرة , نازل و عارف انه ممكن ميرجعش لأن في ناس قبله مرجعتش يساوي معنويا كام واحد من متظاهرين نزلوا مع القوة دي و في حمايتها ؟ الواحد بعشرة مثلا ؟

-طيب ثوار التحرير نايمين ادام عجلة الانتاج موقفينها , سؤال بسيط , ثوار العباسية الأبرار-مع احترامي- قاعدين عند البوجيهات  و لا إيه بالظبط عشان انا مش فاهم مكنة الانتاج المصرية؟

- بالنسبة للعجلة , تكلفة قنابل الغاز المتنوعة و المطاطي و الخرطوش ال(اتنفخنا) بيها كان ممكن تنفخ كام عجلة

- عشان مكونش بلطجي هعمل عملية تجميل عشان اشيل اثار الحبوب , و واحدة تانية عشان العلامة بتاعت لما وقعت من علي العجلة , و كمان واحدة ابيض وشي بالمرة زي مايكل جاكسون , و هشتري كل هدومي من (اديداس) , المشكلة ان بعد التعديلات دي هبقي (ممول) ؟؟؟؟

-انا بلطجي و عايز اخرب مصر و اضرب المجلس في مقتل , و معايا ملتوف, بالعقل كده ارميه علي مبني انا واحد من الناس بعدي ادامه يوميا بقالي 6 سنين و للأسف مكنتش اعرف انه المجمع العلمي و لا ارميه وراية علي (الجامعة الأمريكية)

-اليجيب السكر ان من كام سنة مجلس الشورة الجنب المجمع بخطوتين طفوه بهليكوبترات اطفاء , اليجيب الضغط ان نقطة اطفاء التحرير قدام المجمع علي الرصيف التاني يعني بنتكلم في 15 متر مثلا , اليجيب الجلطة بقي ان حسني من كام سنة بعت طيارات اطفاء عشان تطفي حريق في غابة في اسرائيل ,اليجيب ....... ان انا بتكلم عن حريق مبني قصاده اولاد اتيتموا و ستات اترملت و امهات قلبها اتحرق و بنات اتضربت و اتعرت , يغور المبني بالكتب الفيه

- جدار في القصر العيني , و جدار في محمد محمود , و جدار في الشيخ الريحان ...... حصار ام حماية , حماية إيه من إيه ؟؟

- انا كنت واحد من الناس , مبزعلش اوي هدخل الجيش –او (هلبس جيش) كما هو التعبير الدارج- عطلة و وقف حال بس واجب لازم نعمله و نتشرف بيه كمان, عشان صورة الجيش في عقلي كانت جنود بيرشوا ميه علي الساتر الترابي و مية القناة لونها احمر من الدم , لكن الصورة دلوقتي بقت جنود بيحدفوا طوب وجنود بيعروا بنت و جندي بيضربها بجزمته بدقة علي الجزء العاري من جسمها و اخر (بيرش) مية علي الناس, ده الموضوع رخص قوي

-ايوة عادي يعني , هناخد نفسين الغاز  و نطلع نجيب بجنيه لب , حلاوة روح , و ممكن بطاطة أوكشري او فشار او درة او رز بلبن عليه بسبوسة او..... زلابية

-الشيخ الجليل يقول انه يشم رائحة الجنة في الميدان , و يرفع الله روحه إليه في الميدان......صدفة ؟؟

-عمري ما هفقد الأمل في الثورة ,مرة كنت باسأل والدي عن حياته في سنوات النكسة , اكتشفت انها بالنسبة لي حاصل طرح 1967 من 1973 , تاريخين مكتوبين في كتاب , لكن بالنسبة للجيل ده 6 سنين , باليوم بالساعة , احساس بالأحباط و الهزيمة رغم كده رغبة في العمل , اعمار الشعوب بتتعد بعشرات و احيانا بمئات السنين , و الكان فاكر ان الموضوع هيخلص في ايام او كام شهر يبقي غلطان,الثورة مستمرة

اذا اعجبتك مش مهم تعمل (لايك) او تكتب (كومنت) , المهم تنزل الميدان النهاردة , و اذا معجبتكش برده يا ريت تنزل

زلابية !!!!!

دول كام (فيسبوك ستاتس)  كنت هكتبهم في رمضان ...... و قررت اكتبهم في الكراسة

......

مكتبتهمش علي (الفيسبوك ليه)  ليه ؟

عشان الكمبيوتر بتاعي اتحرق , بجد طلع دخان و بشحت لابتوبات اخواتي من وقت للتاني, و عشان عجبتني فكرة الكراسة و اتحولت لشبه مذكرات  , حاجات كده يعني

طب منزلتش  في رمضان ليه ؟

لا , مكنتش في المود خالص , لظروف سيتم ذكرها لاحقا

طيب بتصدعنا دلوقتي ليه ؟

العيد فكرني بالموضوع , فراغ , عموما شكرا علي العشر دقايق الجايين الهتضيعهم معايا , نورتني فعلا

-بكرة اول يوم رمضان , رمضان في مصر حاجة مختلفة ,الفوانيس , محلات فول بتحتل الرصيف قدامها , السحور الأول مع الصحاب , قعدة متتعوضش , خاصتا لو غسيل البلكونة الفوقينا بينقط , غسيلهم بنطلونات و شورتات بس , مبيلبسوش حاجة من فوق , (هادي) بيقترح ان دي شقة فريق سباحة .

-طيب يا جماعة , انا مسافر الحجاز النهاردة , هتوحشوني تنين , لكني مش قلقاااااااااااااان ,تذكرتي رااااااايح جاي  

-قشطة جدا , المغرب بيأذن هنا قبل مصر بنص ساعة......يا جعانيييين

-هل يجوز اني ادعي ان واحدة تحبني ؟ عموما دعيت ولا مدعيتش هو في حاجة هتستخبي علي ربنا

-غريب شوية رمضان بتاع الأجازة ده , فين زمان لما كنا نروح المدرسة بدري , و نقعد نقرأ قرأن في الحصة ......في  رمضان و بنقرا قران يا مستر (مش عاجبك..اعترض بقي) .....و تيجي حصة الألعاب و نلعب كورة كتييييير !!!!!

-جامد اوي التتر بتاع (شارع عبد العزيز) , ازاي تواشيح و اغنية شعبية يتعملهم توزيع روك .....أبداع

-بابا بيكره الأشارات جدا , و لا يعترف بالضوء الأصفر ,السوبر ماركت علي بعد  نص ساعة ,بس احنا هناخد الدائري , كلها ساعة و نص .....بس من غير اشارات .

-السوبر ماركت هنا معظمها زي كارفور كده ,مساحة شاسعة , الرز مثلا بيتباع بالشوال 5-6 كيلو ,و مش علي رفوف , مربع علي الأرض نقول 3*3  متر و ارتفاع متر و نص , و الناس بتاخد بالخمس اشولة , 16 كاشير كلهم قدامهم طوابير ,الناس بتشتري اي حاجة بأي كمية ,خرجنا اخيرا و ركبنا العربية , شغلت  الراديو ......"الصومال تستغيث , أغيثوا الصومال "

-ماما لسة ماجتش , هتحصلنا بعد اسبوع كده , اختي البتطبخ دلوقتي ,اكلها حلو بصراحة , بس لما بتطبخلنا بحس انها كاسرة عيني , انا باكل و انا خايف

-هييييه , ماما جت , طعام لا يتبعه من ولا أذي

-عادي ان بابا يبقي واقف في المطبخ , و عادي اكتر انه يبقي بيعمل زلابية (لقمة القاضي في ثقافات اخري),لكن المش عادي انه يكون بيعمل تجارب علي الزلابية , و مقسمها مجموعات ......

زلابية 1:عليها فانيليا

زلابية 2: بدون فانيليا

زلابية 3: عليها نشا , عشان تقرمش

زلابية 4 :عليها كاستر , عشان تبقي صفرا

زلابية 5: معليهاش حاجة

بس طلعوا حلوين في الأخر ,تسلم إيدك يا بوب

-الهم ارزقنا دولة يعز فيها شأن اهل الطاعة.......اااااامين.....ويذل فيها شأن اهل المعصية......أأأ.....مش عارف , طيب ما نقول ربنا يهديهم احسن , ليه الذل ؟

- فعلا كنت هعيط لما الكبير عمل اخر تاتش داون ......و الله و عملوها الرجالة

-عايز اسجل اعجابي بذكاء صناع اعلان (كوتونيل),هو الهدف من الأعلان إيه ؟ ان الناس كلها تبقي بتتكلم عن المنتج , و ده الحصل , حتي لو بمنتهي الأبتذال و حتي لو هيكرهك في  صحابك  و يحولهم في ذهنك ل......كاروهات و مخطط و كده .

-و بعدين بقي ,بقينا نص رمضان و النتيجة مطلعتش , عايزين ندعي بحاجة تانية

-النتيجة طلعت , زهرة بيجيبهالي , ربنا يستر

-درجة يا ولاد ال........, الواد زهرة ده فقري , بس هو جابلي نتيجة السنة الفاتت و كانت كويسة , احنا اسفين يا زهرة .

- عبد الحميد –صديقي الصدوق قوي يعني- بيقوللي كنوع من التشجيع "اعتبر سقوطك في النسا جزء من فشلك العام في الحياة مع النسا"

-بما ان في مذاكرة دلوقتي , أضطريت اغير المسجد ,هروح للشيخ محمود عشان بيقصر , مضطر و الله, سعودي من اصل موريتاني , لهجته غريبة جدا , مش فاهم من الدعاء اي حاجة .....اااااامين , اكيد بيدعي بحاجات كويسة

-ربنا يخليه و كل حاجة , بس مش لازم يعني كل يوم ندعي للملك .......و ولي عهده ........و نائبه ......و نائبه الثاني ........و وزرائه ........و بطانته ....الخ

-عاااااااش يا ليبيا , هو ده الكلام الصح , بلا سلمية بلا كلام فاضي

-اخواني الليبيين , خلصوا عليه هو و عياله من دلوقتي عشان المحاكم حبالها طويلة , و تلاقي فلاشة متبرشمة و يقولك احراز و حاجات كده

-مطار جدة , 2 كاونتر ل300 هندي , 2 كاونتر ل200مصري , 3 كاونتر ل50 سعودي , العنصرية ....لا دين لها

-انا في الطيارة راجع مصر , احساس بالسعادة ,اهي مصر دي اكبر دليل علي ان الحب ملوش علاقة بالشكل ,بنحبها بالزحمة و الدوشة و المشاكل  و المباحث ......ألخ

بس كده

<photo id="1" />

اسئلة طائفية مغرضة تودي في داهية

انا ضد اي اعتداء علي شخص مدني بغض النظر عن دينه او عرقه , و بطبيعة الحال انا ضد الاعتداء علي اي شخص بسبب دينه او عرقه , مش هتكلم هنا عن احداث امبابة لسببين , اولهم اني لا اعرف التفاصيل  و انا مقصدش تفاصيل التلفزيون , اقصد تفاصيل من رئي و من حقق , ثانيا , دايما لما بتحصل مشاكل من النوع دا بفتكر الأسبوع لو كانوا المسلمين او الأخوان او السلفيين عايزين يحرقوا كل كنائس مصر كان حصل و العكس صحيح , و لو الأهلوية كانو عايزين يحرقوا نادي الزمالك كان تم ,عادي جدا , انا اصلا عندي رأي شخصي ان مصر مفيهاش فتنة طائفية , او مكانش فيها , الفتنة الطائفية اكذوبة اخترعها النظام السابق , زي ما شركات الأدوية بتصنع الفيروس و تصنع العلاج , و الثورة المضادة بتستخدم الأكذوبة دي دلوقتي , ان مش محلل سياسي او اجتماعي , لكن اظن لو مصر كان فيها فتنة طائفية مكانش جدي شارك اعز اصدقائه (المسيحي) في مشروع كلفه كل فلوسه تقريبا , يعني كان يبقي صاحبه بس ميشاركوش في فلوس ولا إيه ؟

لكن انا عندي شوية اسئلة :

ليه لو انا سرقت واحد مسيحي الصحافة هتكتب (مسلم يسرق مسيحي) لكن لو انقذته من محاولة سرقة هتتكتب (مواطن ينقذ مواطن) ؟ ليه بقينا بنروج للأفكار الأخترعها جورج بوش الأبن ان مسلم تساوي ارهابي مع فارق بسيط ان اصبحت سلفي تساوي ارهابي , مع العلم ان السلفية هي الأسلام لأن معني كلمة (سلفية) هو اتباع السلف أي القديم أي سنة سيدنا محمد (ص) و صحابته رضي الله عنهم .

ليه اليحرق اي منشأة او يأذي اي حد ميتعاقبش علي الجريمة بغض النظر عن دين المعتدي و المعتدي عليه؟

ليه و انا واقف مع صاحبي المسيحي حاسس من جواية اني متهم , رغم اني معملتش حاجة , بل انا ضد اي اذي ليه بسبب دينه , لأن الأذي لشخص بسبب دينه اهانة للأنسانية , بلاش ,خليني اناني اكتر شوية , لأن اهانة مسيحي بسبب دينه في مصر زي اهانة مسلم بسبب دينه في اوروبا او امريكا .

ليه ريم ماجد – انا بحترمها و بحب ادائها علي فكرة- تقول بأستنكار شديد ان اسامة بن لادن صلوا عليه صلاة الغائب و الشيخ اسامة القوصي –مع اعجابي و احترامي له ايضا- يقول ان الصلوا دول متخلفين ؟

انا بكره اسامة بن لادن, لأن و لتاني مرة انا ضد قتل اي مدني لأي سبب كان – إذا كان هو العمل كده – و لأن افعاله او الأفعال النسبت إليه ضرت المسلمين في العالم كله سنين عديدة و لكن في النهاية اسامة بن لادن مسلم , له حق ان يدفن و يصلي عليه , زي اي مسلم محكوم عليه بالأعدام , و لو كان قتل نفسا بغير حق فأظن ان الله سبحانه و تعالي قادر علي ان يقتص منه خير القصاص.

ليه وصلنا لدرجة اننا بنعمل دعاية ان الأسلام بريء و حلو و أعلانات زي "الأرهاب لا دين له", بنعمل دعايا لدين "لكم دينكم و لي دين" و "من قتل نفساً بغير نفس أو فساد في الأرض فكأنّما قتل النّاس جميعاً ومن أحياها فكأنّما أحيا النّاس جميعا " , دين كانوا اهله زمان – الهم السلف- كانوا حتي في الحرب عندهم اخلاقيات , مبيضربوش حد في ضهره و حتي في حروب القبائل كان لو قائد قبيلة راح يحارب قبيلة تانية و لقاه مش جاهز , كان بيقوله هرجعلك بعد شهر عشان مش من الفروسية انك تقهر عدو في ضعفه .

ليه قربنا نوصل لدرجة ان و العياذ بالله هنخجل من ديننا , و لو واحد مسافر بلد اجنبي و اسمه يوسف هيبقي (جو) او (جوزيف) عشان يستحسن يداري دينه , و لو اسمه احمد او محمد تبقي مصيبة ؟

انا اسمي محمد , انا مسلم , بلبس تي شيرت و بنطلون و بحلق دقني , مش عارف انا كده سلفي ولا لأ بس انا بتبع سنة سيدنا محمد (ص) و الصحابة رضي الله عنهم , بأستبعاد الجماعات السياسية البتسمي نفسها بالأسم ده , انا بتكلم عن معني الكلمة في القاموس, انا نفسي اليقتل او يحرق او يهد يتعاقب , باستبعاد دينه ,عشان المسيحيين عايزين حقهم , و عشان الأسلام اتبهدل مع الميعرفوش عنه حاجة اليومين دول , ولا إيه ؟ انا بسأل

ً

كوابيس مضادة للأشتعال

ملحوظة: الكلام الفاضي ده اتكتب قبل الثورة بكام يوم

كنت قاعد علي السرير بتفرج علي التلفزيون , القناة كانت الجزيرة , بصراحة مكانتش طالبة , بس انا كنت تحت اللحاف و الريموت بعيد و الجو برد , لسة هقوم اجيب الريموت و ارجع تحت اللحاف و علي ما ادفي تاني فيها يجي ربع ساعة , المهم الأخبار كلها كانت عن شباب بيحرقوا نفسهم في جميع انحاء الوطن العربي , (عاجل) شاب مصري يحرق نفسه امام مجلس الشعب و وزير الصحة يزوره في المستشفي , انتو مجانين يا جدعان الحصل في تونس ده مستحيل يحصل عندنا , بدأت امل من الحوارات دي و دخلت في النووووم...... (و تخيل الصورة بتلف مع فادينج زي لما البطل بيحلم في الأفلام )ه

كنت ماشي في شارع القصر العيني راجع من الكلية و انا ماشي قدام مجلس الشوري , فجأة لقيت شاب بيزعق (كفاااااااياااا......حراااااااااااام) و قام دالق علي نفسه بنزين و طلع ولاعه و ولع في نفسه , و في لحظة كل الكاميرات العليها مسدسات اتوجهت عليه و بدأت ضرب ......مية,و يجي عشرين عسكري طلعوا يجروا عليه بمسدسات .....مية و هات يا ضرب ....ميه و بعد كده تلطيش لحد ما الأسعاف وصل .

-كنت قاعد انا و اصحابي في كرنيش ابو الفدا في الزمالك , و للميعرفش كرنيش ابو الفدا ده شارع ضلمة بيطل علي النيل كل الفيه (كابلز) او ناس بتحشش و شوية ناس ضالة بتحب النيل و الهدوء , و كالعادة عدي عليه يجي 3 شباب يسئلوني إذا كان معايا بفرة , و فجأة مكروباص ازرق دخل الشارع , نزل منه راجلين شكلهم شر , و راحوا علي شلة جنبنا ,

"ايه ده يلاااا" 

"ولا حاجة يا باشا" 

و فتح ايده بالعافية و مسك الجوينت

"ولعت أزاي ياااد"

"السخان بتاع العربية يا باشا"

و فجأة لقينا شاب بيجري....طلعوا وراه و مسكوه

"أيه الفي إيدك ده يلا "  طاخ علي قفاه

"ميريت اصفر والله يا باشا "

"افتح الشمال يااااد" طاخ علي وشه "إيه ده ,مشط كبريت , نهار الجابتك مش فايت ,ارمي الكلب ده في العربية " و ركبوا العربية و مشيوا

-داخلين الأستاد نشوف ماتش الأهلي و الزمالك , اتفتشت و انا داخل , مفيش حاجة , الموبايل في جيبي اليمين و ال(سويس نايف) في جيبي الشمال , عديت و بعد ما مشينا شوية لقينا واحد ورانا عند التفتيش بيهروه ضرب.....يا تري لقوا معاه إيه؟

المهم الأهلي كسب كالعادة و طلعنا نرش مية في الهوا و زيطنا !!!!!!

لما روحت بتمشي في شارع مصدق و لقيت عند 

Kitchen store

Special offer up to 50% :

1-electric heater 2 stations  5000 L.E

2-micro wave oven             16000L.E

3-electric oven                    20000L.E

العمارة البعديه كانت بتتبني و الغفير كان قاعد بيتدفي قدام لمبة 100 وات , و (كيتل) الشاي بيغلي جنبه !!!!!!

و صحيت من النوم , مذهول , عرقان و عطشان جدا , رحت المطبخ اشرب

ماما: "صح النوم يا استاذ , هتذاكر امتي و هتنام تاني امتي عشان تروح ال.......الخ

و لقيتها بتدوس علي زرار في البتجاز و بدأ يتك.....تك......تك...تك......و لأاااااااااااااااااااااااااااااا!!!!!!!

و بعد التهريج , ادعو الله ان يرحم شهيد الأمة العربية (محمد البو عزيزي) , اللهم ارحمه بقدر ما كان موته هو الوقود الذي أضاء شعلة الحرية في الوطن العربي